” السعيد الخطاط ” يرفع شعار ” يعملوها الكبار ويقع فيها الصغار ” بعرائس اللمبي هذا العام .. المستقبل الإخباري

أجرت الحوار / ياسمين عادل 

 —  شخصيتنا الأسبوع ده غير كل الشخصيات بيسعدنا كل سنة وهو دايما في الكواليس رجل ظل يفعل لاسعادنا ولا ينتظر كلمة شكر عشان كده المستقبل الإخباري قررنا نشكره علي طريقتنا .. هو بورسعيدي بأخلاقه وجدعنته وحبه لوطنه الأم مصر هو السعيد الخطاط بن شارع الدقهلية .

تعريف 

ياريت تعرفنا علي نفسك يافنان …؟؟

أنا محمد السعيد 40 سنة مشهور بالسعيد الخطاط بورسعيدي وليا الفخر أني من بلد الأبطال بورسعيدي أبا عن جد بن شارع الدقهلية دخلت في مجال الرسم والكتابة من قبل ما أحصل علي دبلوم فني ثم دبلوم الخط العربي  وأعمل مدير إدارة بشركة جازكو

يعني داخل المجال وأنت حبه مش مجبر عليه …صحيح

 

بداية الحكاية

بدأت حكايتك مع إحتفالية شم النسيم واللمبي أزاي وأمتي ؟؟؟؟؟؟؟

الحكاية بدأت من أيام جدتي ومن بعدها والدتي لما كانوا وأنا صغير بيصنعولي دمية وبيستخدموا فيها الإمكانيات البدائية الموجودة في البيت زي (( قميص قديم ..بنطلون والخ )) وكانوا بيحرقوهالي قصاد البيت ليلة شم النسيم عشان أفرح .

والدتي لاحظت أني موهوب في الرسم فبدأت تعملي اللمبي بطريقتها وتسيب ((الرأس)) عليا أرسمها وأشكلها وفي يوم قالتلي طب ما تبدأ تفرج شغلك للناس ومن هنا إتشجعت وبدأت مشواري  ورغم أني مش نحات إلا أن ربنا ساعدني ورزقني بالموهبة دي مع الإجتهاد والممارسة  أنا بفضل الله شغال في إحتفاليات شم النسيم وعمل (( اللمبي )) من التمنينات الي الأن .

 

اللمبي 

الغريب أن اللمبي معروف فقط في الباسلة بورسعيد .. إحكيلنا حكايتة أية سي اللمبي ده ؟؟؟؟!!!!!!

بصي ياستي اللمبي ده كان إسم المندوب السامي البريطاني أيام الإحتلال الإنجليزي لمصر وكان مكروه من الشعب المصري جداً لأن في سنة 1919 أصدر حكم بنفي الزعيم سعد باشا زغلول خارج مصر وتصادف وجودة في بورسعيد مع أعياد الربيع ولأن بورسعيد بلد الوطنية وده من زمان كانوا عايزين يقتلوه فعرف وتمكن من الهرب قاموا عملوا عروسة علي شكله وهيئته وحرقوها وأصبحت عادة وسمة من سمات إحتفالاتنا بأعياد الربيع .

الشخصيات

بتختار شخصياتك إزاي أو بتجيلك أفكار مواضيعك منين ؟؟؟ لأني ملاحظة ان كل سنة ليها موضوع مختلف عن السنة اللي قبلها ؟؟؟؟!!!!!

هو من الواقع اللي عايشينه يعني الحكاية بدأت بشخصية مكروهة للشعب المصري ومع مرور الزمن بقينا بنختار أعداء الوطن أو الشخصيات السلبية في المجتمع أو قضية مشغولين بيها بالشكل ده بحدد شخصيات وموضوعي السنة دي يعني أنا إتكلمت في موضوعات سياسية وإجتماعية وجسدت أعداء بلدنا ..((كنت عايز أضحك الدنيا علي كل اللي يفكر يعادينا))  زي ((أردوغان وموزة وتميم )) جسدت ((مبارك ونظامة ))عملت ((بشار الأسد )) وأحيانا بتكلم عن ظاهرة معينة بشكل ساخر كمان بحط شخصيات صنعت المجد لبورسعيد ولمصر لان للاسف في أجيال ما يعرفوش تاريخهم أتكلمت عن أمجاد النادي المصري العريق

 

عائلة خضير 

طبعا عائلة خضير لها باع في إحتفاليات شم النسيم وصناعة اللمبي ..هل بيحصل تنسيق بينك وبينهم في إختيار الشخصيات حتي لا تتكرر في سنة واحدة ؟؟؟

الحقيقة مش بيحصل أي تنسيق كل واحد فينا بيشتغل بحريته وأحيانا بيكون في حدث لازم نتكلم عنه وحصلت من قبل أننا كررنا شخصيات في نفس السنة زي ((أردوغان ))  بس الفرق طريقة التقديم كل واحد فينا بتجيله فكرة مختلفة بيحط الشخصية في إطارها وده اللي مستحيل يتكرر  .

 

الأجيال الجديدة

هل مازال الشعب البورسعيدي متمسك بعوايدة في إحتفاليات شم النسيم وألا الأجيال الجديدة بعدت عن التقليد دة ؟؟؟

بالعكس البورسعيدية لسه متعلقين بالسمسمية واللمبي ولمتنا … عايزة أقلك أن البلد دي عليها حق وأنا أخترت أن أسعد الناس بالفن وعشان ما يضيعش تراثنا وتاريخنا وأعرف ولادنا وإحنا مين وأفرح أهالينا وده أكبر مكسب ليا رغم المجهود الغير عادي اللي بيستمر أكتر من شهرين بفضي فيهم نفسي تماماً حتي عن شغلي بيستمر عملي فاليوم أكتر من 6 ساعات متواصلين غير التوتر بالإضافة للتكلفة المادية اللي بتعدي ((50 ألف جنية )) للإحتفالية غير المجهود بس كله يهوووون عشان خاطر بلدي وأهل بلدي وفرحة الناس  دي بالدنيا .

الصعوبات 

ياتري بتواجه صعوبات كل سنة في إقامة الإحتفالات اعياد الربيع سواء مع الحي أو الجهات الامنية في أستصدار تصاريح ؟؟

بصراحة الامن متعاون جدا وعارفني لاني شغال من سنين كل سنة بيجوا هنا وبيحصل تامين للمكان بالاضافة لاننا كشباب الشارع بنبقي جاهزين ومستعدين لتامين اخواتنا البنات والسيدات والتعامل مع أي حد يفكر انه يتعرض لهن اللي بيجي هنا عارف نظامنا الكل هنا بيحترم بعضه عشان كدة اي حد بيتعرض لحد من اخواتنا بنتعامل معاه وبالأدب  .

الأولاد

هاتعلم أولادك صنعة اللمبي وتورثهالهم ولا هاتوقفها عندك ؟؟؟؟

أنا عندي كريم وسجي .. كريم عنده 7 سنين عايز أقلك أنه بيقلدني في كل حاجة بيعمل عرايس وبيعملهم مسرح وبيرسم وشوش فالحمد لله عشان هايجي عليا وقت وأعجز ألاقي اللي يكمل من بعدي

أنا دايما بعلمه وبقله الحكاية مش ألوان ورسم وخلاص ((أهم حاجة أننا نفرح البورسعيدية أهلنا )) بزرع ده جواه .

أكبر شخصية 

أكتر شخصية كان نفسك تجسدها أية ؟؟؟؟

كل ماهو سلبي ومعادي لبلدنا …بس الصراحة اللي فعلا نفسي اعملهم لمبي هما طقم عمل قناة مكملين

الله ينور عليك والله ..

السنة دي 

فكرة السنة دي عن أية ياتري وجتلك إزاي ؟؟؟؟؟؟

السنة دي عنوان الموضوع (( يعملوها الكبار ويقع فيها الصغار )) علي فكرة كل سنة بيبقي فيه عنوان مختلف لكل موضوع

والفكرة جاءتني بناء علي طلب سيدات كلموني عن مشكلاتهم مع أزواجهم سواء الزوج المتعاطي للمخدرات او الزوج البخيل رغم أنه متيسر أو الزوج الكسلان وسايبها شغاله فالاستثمار عشان تصرف ع  البيت  او اللي بتخلف بنات وهو عايز الولد وفالنهايه الحل يا الطلاق يا الخلع   .

 

تحب تضيف حاجة يافنان ؟؟؟

عايز أقول أن بلدنا حلوة والبلد فيها تطور وده حصل علي أيد الرئيس السيسي عشان كده أنا فكرت أعمله بنر مالقيتش أحسن من دعوة صادقه من أبناء بورسعيد اللي بيحبوه ربنا معاه ويسنده .

 



إعلان